თბილისის მაღაზიებში შაქარი გაიაფდა. გუშინ მაღაზიებში ფასები ისევე მკვეთრად დაეცა, როგორც აიწია. თუ ორი დღის წინ საცალო ქსელში ერთი კილოგრამის ფასმა 3 ლარს მიაღწია, უკვე გუშინ მან 2.40 ლარი შეადგინა. როგორც დიღომში მდებარე ერთ-ერთ სასურსათო მაღაზიაში განაცხადეს, ორი დღის წინ მათ ფასი დირექტორის მითითებით გაზარდეს. მანვე მიიღო გადაწყვეტილება ფასის შემცირების შესახებ.

სუპერმარკეტების ქსელ „ვეჯინში“ აცხადებენ, რომ შაქრის პანიკური შესყიდვის დროს მათ ფასი 2.60 ლარზე უფრო მაღლა არ აუწევიათ. მათივე თქმით, კომპანიამ გადაწყვიტა ფასის დაფიქსირება, რათა ხელი არ შეეწყო პანიკისათვის.

შაქრის ფასი ხელოვნურად გაიზარდა და ამან მოსახლეობაში პანიკა დათესა. ამის შესახებ განაცხადა „ქუალითი შუგარის“ დირექტორმა ილხამ ალიზადემ. მისი თქმით, უკანასკნელ დღეემში კომპანიას ფასები არ აუწევია და დღეისათვის ერთი ტომარა 109 ლარი ღირს.