საქართველოში ადამიანის უფლებათა დაცვის სფეროში არსებული მდგომარეობა განხილული იქნება გაეროს ადამიანის უფლებების საბჭოს სამუშაო ჯგუფის მეათე სესიაზე, რომელიც გუშინ ჟენევაში გაეროს ევროპის განყოფილებაში გაიხსნა, იტყობინება გაეროს ოფიციალური საიტი.

4 თებერვლამდე პერიოდში სამუშაო ჯგუფის წევრები ადამიანის უფლებების სფეროში მდგომარეობას , საქართველოს გარდა, შეაფასებენ მსოფლიოს კიდევ 15 ქვეყანაში: ნაურუში, რუანდაში, ნეპალში, ომანში, სენტ-ლუსიაში, ავსტრიაში, მიანმარში, ავსტრალიაში, ნამიბიაში, ნიგერში, მოზამბიკში, ესტონეთში, პარაგვაიში, სენტ-კიტსსა და ნევისში, სან-ტომე და პრინსიპში.

„სამუშაო ჯგუფი განიხილავს, როგორ იცავენ ეს სახელმწიფოები ადამიანის უფლებებს. იგი გაანალიზებს მიღწევებსა და წარუმატებლობებს სამართალდამცავ სფეროში და თავის რეკომენდაციებს გამოიტანს“, - ნათქვამია შეტყობინებაში.

პერიოდული დათვალიერების მექანიზმი ერთ-ერთი ინოვაციაა საბჭოს მუშაობაში, რომელმაც ადამიანის უფლებების კომისია შეცვალა. დაგეგმილია, რომ 2011 წლის ბოლოსთვის საბჭო შეამოწმებს, როგორ იცავენ ადამიანის უფლებებს გაეროს ყველა წევრ ქვეყანაში, გამონაკლისის გარეშე. 2008-2010 წლებში ახალი მექანიზმი უკვე 144 სახელმწიფომ გაიარა.