კრიზისმა სადაზღვევო სექტორს გვერდი აუარა. ეს განცხადება რადიო „კომერსანტის“ პირდაპირ ეთერში „Aldagi BCI“-ის გენერალურმა დირექტორმა გააკეთა.

ნიკა გამყრელიძის თქმით. 2010 წელი წინაზე ერთმნიშვნელოვნად უფრო კარგი იყო. მიმდინარე წელს სექტორი გაიზარდა და განმტკიცდა ფინანსური ჯანმრთელობა. მისივე განმარტებით, 2011 წელს პრიორიტეტული იქნება ჰოსპიტალური სექტორის განვითარების პროექტი. „Aldagi BCI“ საავადმყოფოთა მშენებლობაში 15 მლნ დოლარის ინვესტიციებს დააბანდებს. 2011 წელს აქტივიზაცია სოფლის მეურნეობის დაზღვევის სექტორშიც იგეგმება. კომპანიის ხელმძღვანელის თანახმად, ეს დარგი აქტუალურია და მომგებიანი გახდება. ნიკა გამყრელიძის თქმით, დღეს ფერმერთათვის სესხები ნაკლებად მისაწვდომია, ვინაიდან მათ დაზღვევა არა აქვთ.

“Aldagi BCI“-ის მსგავსად, სადაზღვევო კომპანია “Imedi L“-შიც აცხადებენ, რომ ფინანსური კრიზისი სექტორს ნაკლებად შეეხო, რადგანაც სადაზღვევო ველი ნაკლებად იყო ათვისებული. მათი თქმით, 2009-2010 წლებში სადაზღვევო კომპანიებმა დინამიური ზრდა გააგრძელეს. კომპანიის მენეჯმენტის ინფორმაციით, 2010 წლის სამი კვარტლის განმავლობაში მოზიდული პრემიების მიხედვით, გასულ წელთან შედარებით, 25%-იანი ზრდა დაფიქსირდა. მომავალ წელს „Imedi L“-სთვისაც მნიშვნელოვანი იქნება ჰოსპიტალური სექტორის განვითარება. კომპანია 10 საავადმყოფოს ააშენებს.