მეცხოველეობისა და მეფრინველეობის მიზნით მომავალი წლიდან საქართველოს სოფლის მეურნეობის სამინისტრო სიმინდის პროგრამის განხორციელებას დაიწყებს. დღეს საქართველოს სოფლის მეურნეობის მინისტრმა ბაკურ კვეზერელმა პროგრამა გააცნო ფრინველის ფაბრიკის პერსონალს მუხრანში.

როგორც მინისტრმა აღნიშნა, დაგეგმილია სიმინდის ჰექტარული მოსავლიანობის ამაღლება და მარცვლეულის წარმოების ინტენსიფიცირება, რაც მეცხოველეობისა და მეფრინველეობის განვითარებაზე აისახება.

„პროექტები, რომლებსაც მთავრობა ახორციელებს, მიმართულია მეცხოველებისა და მეფრინველეობისათვის პირობების გაუმჯობესებისაკენ. მწარმოებლებს საკვებისათვის ექნებათ ნედლეულის ბაზა, რომელიც უფრო ხელმისაწვდომი იქნება, რაც საბოლოო შედეგად ქათმის ხორცზე ფასების შემცირებას გამოიწვევს“, - თქვა ბაკურ კვეზერელმა.