ამერიკული ინტერნეტ-კომპანია AOL-ის ფინანსურმა მრჩეველებმა შეთავაზეს მას განვითარების რამდენიმე სცენარი, მათ შორის გაერთიანება კონკურენტ Yahoo!-თან. ამის შესახებ წერს The Wall Street Journal. მანამდე კომპანიათა გაერთიანების საკითხი უკვე განიხილებოდა, თუმცა მხარეებმა შეთანხმებას ვერ მიაღწიეს.  

აღნიშნული სცენარის განხორციელების გზაზე ძირითად სირთულეს წარმოადგენს აუცილებლობა Yahoo-სათვის, დამოუკიდებელი გახადოს თავისი აზიური აქტივები, კერძოდ: Yahoo! Japan და Alibaba Group.  

AOL-ის ხელმძღვანელის ტიმ არმსტრონგის თქმით, თანამშრომლობა ორივე კომპანიისათვის ხელსაყრელი იქნება, ვინაიდან ისინი მსგავს ბიზნესს აწარმოებენ. თუმცა, მან აღნიშნა, რომ AOL დამოუკიდებელი სტრუქტურის სახითაც არის პერსპექტიული.

პირდაპირი გაერთიანების ერთ-ერთ ალტერნატივად განიხილება კერძო საინვესტიციო კომპანიის შექმნა, რომელიც მართვას გაუწევს Yahoo!-სა და AOL-ის საერთო აქტივებს.

უკანასკნელ დროს AOL-მა ბაზარზე დიდი აქტიურობა განავითარა. სექტემბერში მან ქსელური კონტენტის შემმუშავებელი კომპანია 5min, ასევე ტექნობლოგი TechCrunch შეიძინა.

AOL-სა და Yahoo!-ს გაერთიანება საშუალებას მისცემს კომპანიებს, ინტერნეტ-რეკლამის გლობალურ ბაზარზე უფრო ძლიერი პოზიცია დაიკავონ. უახლოეს მომავალში ეს ბაზარი შეიძლება 2.5-ჯერ გაიზარდოს, კერძოდ, ვიდეოკონტენტის ფართო გავრცელების წყალობით.