დღეს საქართველოს პარლამენტმა მესამე და საბოლოო მოსმენით მიიღო კანონი საინფორმაციო-ტექნოლოგიური ზონების შესახებ.

კანონის თანახმად, ის კომპანიები, რომლებიც კომპიუტერული საინფორმაციო სისტემების შესწავლის, მხარდაჭერის, განვითარების, დიზაინის, წარმოებისა და დანერგვის სფეროში მუშაობენ, გათავისუფლდებიან ექსპორტზე გადასახადისაგან  და მათ მიერ საზღვარგარეთ მიღებული მოგება არ დაიბეგრება გადასახადით. ამას გარდა, არ დაიბეგრება დღგ-თი მათ მიერ შექმნილი საინფორმაციო ტექნოლოგიების საზღვარგარეთ მიწოდება, ასევე საქართველოს ეკონომიკური ტერიტორიიდან პროდუქციის გატანა არ დაიბეგრება ექსპორტის გადასახადით.

კანონის თანახმად, რომელიც ძალაში შევა 2011 წლის 1 იანვრიდან, კომპანია, რომელსაც ამ კატეგორიაში შესვლა სურს, „ვირტუალური ზონის პირის“ სტატუსის მისაღებად განცხადება უნდა შეიტანოს. ვირტუალური ზონის პირის სტატუსის გაცემის წესებსა და პირობებს საქართველოს მთავრობა შესაბამისი დადგენილებით დაადგენს.