დღეს პროფკავშირთა კულტურის სახლში გაიმართა სამარშრუტო ტაქსის მძღოლების შეხვედრა სამარშრუტო ხაზებზე გამოცხადებული ტენდერის კომისიის წევრებთან: საავტომობილო ტრანსპორტისა და გზების მუშაკთა პროფკავშირის თავმჯდომარესთან ლავრენტი ალანიასთან და თბილისის საკრებულოს თავმჯდომარის მოადგილესთან, ქრისტიან-დემოკრატთან ჯაბა სამუშიასთან.

მათ განიხილეს ტენდერის ის საკითხები, რომლებიც ყველაზე მნიშვნელოვანია მძღოლებისათვის. მძღოლები კომისიის სამ მოთხოვნას აყენებენ: ტენდერში მონაწილეობა იმ ფირმებმა უნდა მიიღონ, რომლებიც დღეს ავტოპარკსა და მოძრავ შემადგენლობას ფლობენ; დასაქმებული უნდა იყოს დღეს მომუშავე ყველა სამარშრუტო ტაქსის მძღოლი; სამარშრუტო ტაქსის ასაკის საკითხი.

როგორც სამუშიამ განაცხადა, ისინი ყველაფერს გააკეთებენ იმისათვის, რომ მოცემული მოთხოვნები კომისიას გააცნონ.

შეგახსენებთ, რომ მოლაპარაკებათა შედეგად ქალაქის ხელისუფლებებმა დააკმაყოფილეს პროფკავშირის ძირითადი მოთხოვნები. ისინი ეხებოდა ტენდერის 5 ლოტში ჩატარებასა და მის გამჭვირვალობას.