საქართველოში ნავთობპროდუქტების გაძვირება მოსალოდნელი არ არის. როგორც დღევანდელ პრეს-კონფერენციაზე „ნავთობპროდუქტების მწარმოებელთა, იმპორტიორთა და მომხმარებელთა კავშირის“ ხელმძღვანელმა ვანო მთვრალაშვილმა განაცხადა, გამომდინარე იქიდან, რომ ეროვნული ვალუტა - ლარი აშშ-ის დოლარის მიმართ გამყარდა, ბენზინსა და დიზელზე ფასების ზრდა არ იგეგმება.

„უკანასკნელი პერიოდის განმავლობაში ნავთობპროდუქტების ფასები რამდენიმეჯერ 5 თეთრით გაიზარდა და დღევანდელ დონეს მიაღწია. რეალიზატორებს ფასების გაზრდა არ აწყობთ, ვინაიდან რაც უფრო დაბალია ფასები, მით უფრო მაღალია რეალიზაციის მაჩვენებელი“, - განაცხადა ვანო მთვრალაშვილმა.

მისივე თქმით, მიმდინარე წელს ბოლო სამი თვის განმავლობაში ერთი ტონა ნავთობის ფასი 20%-ით გაიზარდა და 818 აშშ დოლარის ნიშნულს მიაღწია, რაც მსოფლიო ბაზარზე სხვადასხვა ეკონომიკური ფაქტორით არის გამოწვეული.