ანაკლიაში საგადასახადო შეღავათები სასტუმროებთან მოწყობილ კაზინოებზეც გავრცელდება. ასეთი შესწორება მზადდება კანონისთვის „სალიცენზიო და სანებართვო მოსაკრებლების შესახებ“.

მოქმედი ნორმის მიხედვით, შეღავათები გათვალისწინებულია მხოლოდ სასტუმროებთან მოწყობილი კაზინოებისათვის ბათუმში, ქობულეთსა და ხელვაჩაურში.

შესწორებათა დამტკიცების შემდეგ შეღავათები ანაკლიაში არსებულ კაზინოებზეც გავრცელდება. 100-ზე მეტი ნომრის მქონე სასტუმროებთან მოწყობილი კაზინოები გათავისუფლდება სანებართვო მოსაკრებლისაგან 10 წლის ვადით.

შესწორებათა ინიციატორი მთავრობა გახლავთ. მათი საბოლოო დამტკიცება საქართველოს პარლამენტის საშემოდგომო სესიის დასრულებამდე იგეგმება.