საქართველოს ეროვნული ბანკი 2011 წლის 1-2 კვარტალში ინფლაციის მაჩვენებლის შემცირებას პროგნოზირებს.

როგორც ეროვნული ბანკის ანგარიშშია აღნიშნული, 2011 წლის პირველი კვარტლის ბოლოს ინფლაცია 9%-მდე, ხოლო მე-2 კვარტლის ბოლოს - 8.4%-მდე შემცირდება. მიმდინარე წლის ბოლოსკენ ბანკი ინფლაციის 10.6%-ს პროგნოზირებს.

„საქსტატის“ ოფიციალური მონაცემებით, ნოემბერში, წინა წლის ანალოგიურ პერიოდთან შედარებით, ინფლაციის დონე 10%-ის სიდიდით განისაზღვრა.

„2010 წლის ბოლოს და 2011 წლის დასაწყისში ინფლაციის დინამიკას ძირითადად სურსათზე ფასების დინამიკა განსაზღვრავს. მსოფლიო ბაზარზე ხორბლის გაძვირებამ საქართველოში ძირითად კვების პროდუქტებზე ფასების ზრდა გამოიწვია. სურსათის გაძვირება ინფლაციის მაჩვენებლის მაღალი დონის შენარჩუნებას გამოიწვევს. მაგრამ გამომდინარე იქიდან, რომ ფასების ზრდა ერთჯერადი ფაქტორით არის გამოწვეული, მოსალოდნელია, რომ უკვე ერთი წლის შემდეგ ინფლაცის მიზნობრივ დონეს დაუბრუნდება“, - ნათქვამია ეროვნული ბანკის ანგარიშში.