წლის ბოლომდე საქართველოში ორი საერთაშორისო ავიაკომპანია შემოვა: რუსული „ურალი“ და ირანული „ატეარი“. ამის თაობაზე ინფორმაციას თბილისის საერთაშორისო აეროპორტის ოპერატორი „ტავ-ურბან ჯორჯია“ ავრცელებს.

„ბიზნეს კურიერის“ ცნობით, 2011 წლის პირველ კვარტალში შეთანხმებები კიდევ 4 ავიაკომპანიასთან გაფორმდება, რომელთაგან ორი იტალიური კომპანიაა, კერძოდ: „მერიდიანი“ და „ალიტალია“, ერთი ჩინურია, ხოლო ერთი - ებრაული.

თბილისის აეროპორტმა ახალ კომპანიებთან კონტაქტების დამყარება ლონდონის ტურისტულ გამოფენაზე შეძლო.

რამდენიმე კვირის წინ „ტაბ-ურბანი“ ღიად აცხადებდა, რომ დაგეგმილი შემოსავლები არ მიუღია. მისი თქმით, აეროპორტის გამშვები უნარი 2 მლნ 500 ათას ადამიანს შეადგენს, მაგრამ ამ დროისთვის მხოლოდ 800 ათასი მგზავრის მომსახურება ხდება. შესაბამისად ბაზარზე ახალი ავიაკომპანიების შემოყვანას ცდილობენ.