საქართველოს ეროვნული ბანკის მონეტარული პოლიტიკის კომიტეტმა გადაწყვეტილება მიიღო, შეინარჩუნოს მონეტარული პოლიტიკის განაკვეთი 7.5%-იან დონეზე ინფლაციის არსებული დინამიკის ფონზე, რომელიც მიმდინარე წლის ოქტომბერში, გასული წლის ანალოგიურ პერიოდთან შედარებით, 9.8%-ით გაიზარდა.

უნდა აღინიშნოს, რომ კვების პროდუქტების გაძვირება 8%-იან დონეზე დაფიქსირდა. კომიტეტი აღნიშნავს, რომ გაძვირება ერთჯერადი, სეზონური მიზეზების შედეგი გახდა.

ეროვნული ბანკის მონეტარული პოლიტიკის კომიტეტმა განაცხადა, რომ ინფლაციური მოლოდინები ბოლო თვის განმავლობაში არ შეცვლილა. „ინფლაციის მაჩვენებლის ზრდა, ძირითადად, გარე ფაქტორების შედეგია. ამგვარად, მოცემულ ეტაპზე ინფლაციის მოლოდინის შესასუსტებლად და ინფლაციის მაჩვენებლის მიზნობრივ დონემდე - 6%-მდე შესამცირებლად არსებობს მონეტარული პოლიტიკის გამკაცრების აუცილებლობა“, - ნათქვამია ეროვნული ბანკის პრეს-რელიზში.

სექტემბერში ეროვნულმა ბანკმა მონეტარული პოლიტიკის განაკვეთი 6.5%-დან 7%-მდე გაზარდა, ხოლო ოქტომბერში - 7.5%-მდე.

კომიტეტის მორიგი სხდომა 22 დეკემბერს გაიმართება.