კრედიტორები სამშენებლო კომპანია „ცენტრ პოინტისაგან“ მათთვის ფულის დაბრუნებას მოითხოვენ. მათ დღეს კომპანიის სათაო ოფისის წინ საპროტესტო აქცია გამართეს. კრედიტორებმა ოფისში ძალით შეჭრაც კი სცადეს.

როგორც აქციის მონაწილეებმა განაცხადეს, მათ კომპანიასთან ინდივიდუალური ხელშეკრულებები გააფორმეს და გარკვეული თანხები შეიტანეს. ხელშეკრულების მიხედვით, „ცენტრ პოინტს“ მათთვის ყოველწლიურად მოგების 20% უნდა გადაეხადა, მაგრამ მას პირობა არ შეუსრულებია.

შეგახსენებთ, რომ რთულ ფინანსურ მდგომარეობაში მოხვედრისას „ცენტრ პოინტმა“ კომპანიაზე ყველა უფლება კომპანია „დექსუსს“ გადასცა. ამ უკანასკნელის წარმომადგენლები კრედიტორთა აქციის თაობაზე კომენტარებს არ აკეთებენ.