მიუხედავად პროტესტისა, საატესტაციო გამოცდები მაინც ჩატარდება მაისის მეორე ნახევარში. ამის შესახებ განაცხადა განათლებისა და მეცნიერების მინისტრმა დიმიტრი შაშკინმა გია მურღულიას საავტორო პროგრამაზე „მშობელთა კრება“.

მინისტრის განცხადებით, სკოლის მოსწავლეებს ატესტატის მისაღებად გამოცდების ჩატარება ქართულ ენასა და ლიტერატურაში, უცხო ენაში, ისტორიაში, ქიმიაში, ფიზიკაში, მათემატიკასა და ბიოლოგიაში მოუწევთ.

„საქართველოს მასშტაბით მე-12 კლასებში დაახლოებით 50 ათასი მოსწავლეა და ჩვიდმეტი, ათი ან ასი მოსწავლის არაარგუმენტირებული პროტესტი მეთორმეტეკლასელთა განწყობის სრულ მაჩვენებელს, საბედნიეროდ, არ წარმოადგენს“, - განაცხადა შაშკინმა.