თბილისი შპიონაჟისათვის დაკავებულ რუს მოქალაქეებს ყველა კანონიერი უფლებით უზრუნველყოფს. ამის შესახებ BBC-ის ინტერვიუში საქართველოს საზღვარგარეთის საქმეების მინისტრის მოადგილემ ნინო კალანდაძემ განაცხადა.

მან დაადასტურა, რომ საქართველომ რუსეთისაგან შვეიცარიის საელჩოს მეშვეობით მიიღო ოფიციალური ნოტა, რომლის თანახმადაც ისინი მათთვის ითხოვენ ინფორმაციის მოწოდებას რუსეთის მოქალაქეების იდენტიფიკაციის მიზნით.

„მათ ასევე თხოვნით მოგვმართეს, თავიანთ მოქალაქეებთან საუბრის ნება დაგვერთო. რასაკვირველია, ჩვენ ვუზრუნველყოფთ ყველა დაკავებულს კანონით გათვალისწინებული უფლებებით“, - განაცხადა კალანდაძემ.

მინისტრის მოადგილემ ასევე აღნიშნა, რომ დაკავებულებთან რუსი დიპლომატების დაშვების საკითხთან დაკავშირებით ამჟამად მოლაპარაკებებები არ მიმდინარეობს, უპირველეს ყოვლისა, იმიტომ, რომ საქართველოს კანონმდებლობის თანახმად ეს პირები ჯაშუშობაში არიან ეჭვმიტანილნი, „რაც ნიშნავს, რომ ისინი ქართული მართლმსაჯულების წინაშე წარსდგებიან და თუ მათი დანაშაული დამტკიცდება, ქართული კანონმდებლობის მიხედვით აგებენ პასუხს“, - განაცხადა კალანდაძემ.

მან აგრეთვე აღნიშნა, რომ ქართულმა მხარემ უკვე მოახდინა რეაგირება რუსული მხარის მოთხოვნაზე და ნოტა კომპეტენტურ ორგანოებში გაიგზავნა.