კრიმინალურმა პოლიციამ #10 ხაზის მიკროავტობუსების ექვსი მძღოლი დააკავა, რომლებიც მძღოლთა გაფიცვაში იღებდნენ მონაწილეობას. ამის შესახებ თბილისის საკრებულოს ოპოზიციურმა დეპუტატმა კობა დავითაშვილმა განაცხადა, იტყობინება “GHN“.

„#10 სამარშრუტო ხაზის მძღოლები კრიმინალურმა პოლიციამ დააკავა და მათ ფიზიკური შეურაცხყოფა მიაყენა. მძღოლებიდან 6 ადამიანია დაკავებული, მათგან ერთ-ერთის გვარია ბულისკირი. ისინი პოლიციის მეხუთე განყოფილებაში იმყოფებიან. მოვითხოვთ მათ დაუყოვნებლივ გათავისუფლებას“, - თქვა დავითაშვილმა სააგენტოსთან საუბრისას.

შეგახსენებთ, რომ გუშინ თბილისის სამარშრუტო ხაზების მძღოლებმა გამოაცხადეს გაფიცვა ტენდერთან დაკავშირებით, რომელიც თბილისის მერიამ ჩაატარა. გარდა ამისა, მძღოლები აცხადებენ, რომ, საწვავის ფასების ზრდის მიუხედავად, მათ არ შეუძლიათ მგზავრობის ფასის ამაღლება, ვინაიდან ამ შემთხვევაში კლიენტურას დაკარგავენ.