საქართველოში დანაშაულებრიობის დონის შემცირების ტენდენცია 2010 წელსაც შენარჩუნდა. ამაზე მეტყველებს ოფიციალური სტატისტიკა, რომელიც შინაგან საქმეთა სამინისტრომ თავის ვებ-გვერდზე გამოაქვეყნა.

2010 წელს საქართველოში 34 739 დანაშაული მოხდა, მათგან 17 101 გაიხსნა. შედარებისათვის: 2009 წელს 35 949 დანაშაულიდან 17 659 გაიხსნა, 2008 წელს - 44 644-დან 20 934 გაიხსნა, ხოლო 2007 წელს დარეგისტრირებული 57 746 დანაშაულიდან გაიხსნა 20 746.

სტატისტიკის თანახმად, ვარდების რევოლუციის შემდეგ ყველაზე რთული პერიოდი 2006 წელი იყო - ამ პერიოდში ადგილი ჰქონდა 62 283 დანაშაულს და მხოლოდ 18 207 გაიხსნა. თუ ბოლო 4 წლის მაჩვენებლებს ავიღებთ, დავინახავთ, რომ დანაშაულთა რიცხვი 27 544-ით შემცირდა, ხოლო გახსნადობა 20-ით გაიზარდა.

„ძალიან მნიშვნელოვანია, რომ გასული წელი დანაშაულებრიობის დონის შემცირების თვალსაზრისით გარდატეხის წელი გახლდათ. ჩვენი მაჩვენებელი უკვე უახლოვდება გერმანიის მაჩვენებელს და ბევრად აჭარბებს მრავალი, მათ შორის დასავლეთ ევროპის ქვეყნების მაჩვენებლებს“, - აცხადებს შინაგან საქმეთა მინისტრი ვანო მერაბიშვილი.