შეთანხმება კომპანიებს Nokia-სა და Microsoft-ს შორის საბოლოოდ 2011 წლის აპრილამდე არ გაფორმდება. ამის შესახებ ჟურნალისტებთან შეხვედრაზე Nokia-ს გენერალურმა დირექტორმა სტივენ ილოპმა განაცხადა, იუწყება Reuters.

ილოპმა არ გამორიცხა, რომ შეთანხმების გაფორმება შესაძლოა უფრო გვიანაც კი მოხდეს. ამასთან ერთად, მას არ განუცხადებია, რა მიზეზებს შეუძლია გავლენის მოხდენა კომპანიებს შორის შეთანხმების საბოლოო გაფორმების გადატანაზე.

Nokia-სა და Microsoft-ს შორის ხელშეკრულების გაფორმების თაობაზე 11 თებერვალს გახდა ცნობილი. ხელშეკრულების პირობების თანახმად, Nokia გამოუშვებს სმარტფონებს Windows Phone-ის პლატფორმაზე. ამასთან, Microsoft-ის მობილური ოპერაციული სისტემა ძირითადი პლატფორმა გახდება მსოფლიოში მობილური ტელეფონების უმსხვილესი მწარმოებისათვის.

Symbian-დან (რომლის ბაზაზეც Nokia მობილურ ტელეფონებს უშვებს ამჟამად) Windows Phone-ზე საბოლოო გადასვლისათვის კომპანიამ ორი წელი გამოყო. ამასთანავე, კომპანია ჯერ არ ამბობს, როდის გამოჩნდება ბაზარზე Nokia-ს პირველი სმარტფონი Windows Phone-ის პლატფორმაზე. ამასთან ერთად, მსგავსი მოწყობილობის პროტოტიპი უკვე წარდგენილია MWC-ის გამოფენაზე.

ბაზრის რეაქცია ამ გარიგებასთან დაკავშირებით ნეგატიური იყო. ამგვარად, Nokia-ს აქციათა კოტირებები 20-ზე მეტი პროცენტით შემცირდა და 12-წლიან მინიმუმს მიაღწია.