საზოგადოებრივი სამუშაოების სახით სასჯელი შეეხება იმ პირებს, რომლებმაც ნაკლებად მძიმე დანაშაულები ჩაიდინეს. ამის შესახებ სამთავრობო სხდომის დაწყებამდე იუსტიციის მინისტრის მოადგილემ გიორგი ვაშაძემ განაცხადა.

მისი თქმით, მოცემული ცვლილება რამდენიმე მიზეზითაა განპირობებული. კერძოდ, პროექტი რეალიზდება პრევენციის მიზნით და დამნაშავეთა რეაბილიტაციისათვის, რათა მათ საზოგადოებაში ინტეგრაცია შეძლონ. „პირველ ეტაპზე საზოგადოებრივი სამუშაოები ადგილობრივი თვითმმართველობის ორგანოებში ჩატარდება, მოგვიანებით კი, სასჯელ აღსრულების სამინისტრო იმ პირთათვის, რომლებმაც ნაკლებად მძიმე დანაშაულებები ჩაიდინეს, სამუშაო ადგილების შექმნას გეგმავს“, - აღნიშნა ვაშაძემ.

სასჯელ აღსრულების მინისტრმა ხათუნა კალმახელიძემ, თავის მხრივ, აღნიშნა, რომ ეს ამ პირებს საზოგადოებაში ინტეგრაციის საშუალებას მისცემს.