საქართველოს განათლებისა და მეცნიერების სამინისტროს მხარდაჭერითა და ხელნაწერთა ეროვნული ცენტრის ორგანიზებით, დღეს, 6 აგვისტოს, ბათუმში ელისო ბოლქვაძის საქველმოქმედო კონცერტი გაიმართება.

კონცერტიდან შემოსული თანხა სრულად ჩაირიცხება ხელნაწერთა ეროვნული ცენტრის მეგობართა საზოგადოების ანგარიშზე და სხვადასხვა მნიშვნელოვანი ხელნაწერის რესტავრაციას მოხმარდება. ბევრ უნიკალურ ხელნაწერთა შორისაა მოქვის სახარებაც, რომელსაც გადაუდებელი სარესტავრაციო სამუშაოები უტარდება. უნიკალური ხელნაწერების გადასარჩენად, საქართველოს განათლებისა და მეცნიერების სამინისტრომ მილიონი ლარი გამოყო.
ღონისძიების დაწყებამდე, მოეწყობა გამოფენა ,,ქართული ხელნაწერი". გამოფენაზე წარმოდგენილი იქნება ცენტრში დაცული უნიკალური ხელნაწერების ზუსტი ასლები (მულაჟები): მათ შორის ხანმეტი ლექციონარის (VII-VIII სს.); სინური მრავალთავის (864 წ).; ასტროლოგიური ტრაქტატის (1188-1210 წწ.) მოქვის სახარების (1300 წ); ,,ვეფხისტყაოსანის'' უძველესი ნუსხების და სხვა ხელნაწერთა ასლები.
 

სწორედ ამ უძველესი ძეგლების გადასარჩენად, მათი როგორც უნიკალური, ეროვნული მნიშვნელობის კოლექციის დაცვის, კვლევის ხელშეწყობისა და პოპულარიზაციისათვის შეიქმნა ხელნაწერთა ეროვნული ცენტრის მეგობართა საზოგადოება, რომლის წევრიც საქართველოს განათლებისა და მეცნიერების სამინისტროა, ამავე საზოგადოების წევრია ელისო ბოლქვაძეც.
 

საქართველოს განათლებისა და მეცნიერების სამინისტროსთან ერთად საქველმოქმედო კონცერტის მხარდამჭერებია: საქართველოს კულტურისა და ძეგლთა დაცვის სამინისტრო; ავიაკომპანია ,,აირზენა''; რადიო ,,მუზა'' და აჭარის ტელევიზია.