საქართველოს წყალმომარაგების სისტემას ელექტრონული რუქების მონაცემთა ბაზა ექნება. როგორც რეგიონალური განვითარებისა და ინფრასტრუქტურის სამინისტროში განმარტავენ, რუქებისა და მონაცემთა ბაზის უახლესი სისტემა, რომელიც გეოინფორმაციულ სისტემაში განთავსდება, შეამცირებს დაზიანებათა რიცხვს, ფინანსურ ხარჯებს, ხელს შეუწყობს მოსახლეობის უკეთეს წყალმომარაგებას, ავარიების დროულ აღმოფხვრასა და სამშენებლო-სარეაბილიტაციო სამუშაოების სწორ დაგეგმვას.

ხსენებული რუქები რეგიონალური განვითარებისა და ინფრასტრუქტურის სამინისტროს წყალმომარაგების კომპანიის საკუთრებაში მყოფი ყველა ობიექტისა და დანადგარის გრაფიკული ვიზუალიზაციის შესაძლებლობას იძლევა. რუქებზე, რომლებზედაც გამორიცხულია ინფორმაციული უზუსტობა, დატანილია წყალსადენი მილები, ჭები და სხვა ყველა მოწყობილობა, რომელიც წყალმომარაგების სისტემაში არსებობს.

დღეისათვის უკვე დასრულებულია საქართველოს 6 ქალაქის რუქა. ესენია: ანაკლია, ქუთაისი, მარნეული, მესტია, ფოთი, ზუგდიდი. დაგეგმილია სპეციალური ვებ-გვერდის შექმნა, რომელზეც განთავსდება ქვეყნის ყველა ქალაქის გრაფიკული რუქა და ისინი მხოლოდ უფლებამოსილი პირებისათვის იქნება ხელმისწავდომი.

პროექტის პრეზენტაცია რეგიონალური განვითარებისა და ინფრასტრუქტურის სამინისტროში გაიმართა.